De Bundesraat för Nedderdüütsch un dat Nedderdüütschsekretariat laadt junge Lüüd to en niegen online-Workshop in. Dat geiht wedder üm de tokamen Tieden mit dat Plattdüütsche un wat sik de Deelnehmers dorto wünschen doot. In den Workshop schall dat nu üm Billen gahn, sünnerlich üm de Billen för Lüüd, de al rut ut de School sünd. Wi kiekt uns an, woans dat an de Universitäten wiedergeiht mit de Lehr vun’t Nedderdüütsche. Wat warrt dor maakt un wat för Wünsch hebbt de Deelnehmers?
Dütmal hebbt wi dree Gäst dorbi: Dr. Birte Arendt, de dat Kompetenzzentrum för Nedderdüütsch-Didaktik in Griepswold vörsteiht, stellt dat Konzept för en interuniversitären Studiengang Nedderdüütsch vör. Över düsse Idee wüllt wi mit jo snacken. As Lüüd vun’t Fach sünd denn ok noch Robert Langhanke M.A. vun de Europa-Universität Flensborg un Prof. Dr. Kersten Sven Roth vun de Otto-von-Guerike-Universität Magdeburg dorbi. Hier hebbt wi de Sichtwies vun en Uni mit grote Nedderdüütsch Afdelen un ut en Land, dat blots Deel II vun de Europäische Sprakencharta tekent hett.
Wat för Vörslääg un Ideen hebbt ji? Wi freit uns op den Uttuusch!
Bi de letzte online-Warksteed hebbt sik de Deelnehmers wünscht, en Plattform to hebben, sik kennentolehren un to vernetten. Dat schall bi düt Drapen ok wiedergahn.
Junge Lüüd sünd hartlich inlaadt – tohören un uttuuschen!
Wokeen dat maken deit: Bundesraat för Nedderdüütsch un Nedderdüütschsekretariat
Anmellen un Nafragen: per Mail an: info( at )niederdeutschsekretariat.de
Frist för’t Anmellen: Maandag, 25.04.2022
Tiet: Middeweken, 27.04.2022, Klock söss bet halvig acht an’n Avend
Wo wi dat maakt: online