Dat wier an'n 21. Februar 1952 as Minschen in Dhaka in't jüst frie worden Ost-Pakistan dorför demonstrierten, dat nich Urdu as Språk vonne Böbelsten Teihndusend, sonnern Bengali as Språk vonne Mihrheit Amtsspråk warden süll. Dat wier dei Anfang dorvon, dat sik Minschen up ehr Mudderspråk besinnen un Poletikers dormit befåten. Un so kümmt dat, dat dei Europarat in'n November 1992 dei „Charta über Regional- un Minnerheitenspråken“ beschluten deit un ok uns plattdüütsche Mudderspråk as Regionålspråk anerkannt wür. Inne MV-Lannes-verfåtung von 1994 is in Artikel 16(2) fastschräben: „Das Land schützt und fördert die Pflege der niederdeutschen Sprache“. Mudderspråken tau plägen höllt dei UNESCO för so wichtig, dat's in't Johr 2000 in Erinnerung an denn 21. Februar 1952 dissen Dach taun Internatschonalen Mudderspråkendach utröppt un dei Minschheit wohrschucht, dörch Akschonen allens tau daun, dat jede von gaut 7000 Språken - un wenn's blot von por hunnert Minschen snackt ward - as Mudderspråk erhollen blifft.
Dat gellt ok för uns plattdüütsche Språk inne nuurddüütschen Bunneslänner, wo noch gaut dei Hälft vonne Inwåhners mit Plattdüütsch taurecht kümmt. Bummelig 14% kœnen noch gaut bet sihr gaut Platt snacken un von dissen Deil noch twei Prozent Platt schrieben. Plattdüütsch is nich mihr so as tau Hansetieden dei „lingua franca“, sall œwer ok nich allein dörch Bäuker von Reuter, Groth, Brinckman un anner Schriewerslüd, dörch't plattdüütsche Theoter, dei plattdüütsche Eck in Tiedungen orrer Radiosennungen erhollen un plächt warden. Ut dissen Grund kann man Platt lihrn: inne Schaul un Spälschaul, in'n Abendschaul, in'n Plattdüütschkring...
2004 keem taun iersten Mål dei Mäkelnborger Verwaltungsvörschrift „Niederdeutsch in der Schule“ rut. Dei Heimatverband e.V. füllt in'n Råhmen von't Lannesprogramm „Meine Heimat -Mein modernes Mecklenburg-Vorpommern“ für jede Spälschaul in uns Land 'n Schatzkist mit heimatkundlichen Materialien zur Vermittlung der Regionalsprache Plattdüütsch. Äbenso kœnen Schäuler wahlwies Plattdüütsch lihrn orrer sogor an söss utwählt Gymnasien 'n mündlich un schriftlich Prüfung in Plattdüütsch afleggen. Ünner dei Devis „Kannst du Platt? - Vertell uns wat!“ ward dit Johr dei 16. Plattdüütsch-Wettbewarf för Kinner un Junge Lüd in MV organisiert. Un ganz nie is, dat Jette Bolz von't Goethe-Gymnasium Demmin taun iersten Mål taun „Plattdüüsch-Botschafterin“ wählt wür un sei so as Wienkönigin för gauden Wien för uns plattdüütsch Mudderspråk Reklåme måkt. Daun wi wat, dat uns Plattdüütsch nich Gefohr löppt so as dei latin'sche Språk blot as dode Språk tau œwerläben.
Dr. Behrend Böckmann
Fotos: Heimatverband MV
